Casco histórico
O casco antigo de Betanzos foi declarado conxunto histórico-artístico no ano 1970. Antigamente situábase no interior da antiga muralla medieval que rodeaba a cidade e que contaba con cinco portas. Porta da Vila, a principal, estaba coroada por tres escudos hoxe encaixados no lateral dunha vivenda. A pesar de non conservarse, o seu nome é usado tal e como indica como lugar de entrada ao centro histórico. Hoxe en día mantéñense en pé tres portas coñecidas como a Porta da Ponte Nova, a Porta da Ponte Vella e a Porta do Cristo.
Betanzos conta con dous monumentos nacionais como son as igrexas góticas de Santa María do Azougue e San Francisco situadas na Praza de Fernán Pérez de Andrade “O Boo”.
San Francisco ten planta de cruz latina e no seu interior pódense ver os sepulcros dos cabaleiros medievais que constitúen o elemento histórico artístico máis interesante do interior do templo, especialmente o sartego de Fernán Pérez de Andrade, que está situado aos pés do templo, baixo o coro, e sostido por un oso e un xabaril.
Santa María de Azougue foi edificada entre a segunda metade do século XIV e a primeira do XV. Ten planta basilical e tres naves. Destaca o retablo do altar e o capitel co único calendario agrícola de Galicia.
![CascoHistorico](https://turismo.betanzos.es/wp-content/uploads/2017/11/CascoHistorico.jpg)
Na praza da Constitución está o edificio consistorial do século XVIII obra de Ventura Rodríguez e o Palacio de Bendaña, do século XV e reedificado no XVII. Ao seu lado álzase o Centro Internacional de Estampa Contemporánea (CIEC), na antiga Casa Núñez. Domina a praza a Torre do Reloxo, do século XVI que está encostada á igrexa de Santiago.
![Pasatempos5](https://turismo.betanzos.es/wp-content/uploads/2018/11/Pasatempos5-600x375.jpg)
Parque do Pasatempo
Situado nos arrabaldes de Betanzos, a construción deste xardín iníciase entre 1893 e 1895, e foi deseñado e custeado por Juan García Naveira.
Dos 90 000 m² con que contaba orixinalmente o xardín, só se conserva unha décima parte. A listaxe de todo o que podemos ver na sección coñecida como as covas fala por si mesma da súa miscelánea reprodución en cemento, un material novo naqueles momentos. Ademais das grutas e pasadizos subterráneos, chama a atención o estanque do Retiro, os murais policromados que reproducen medios de transporte como o aeroplano, o funicular, mapas da canle de Panamá, a pirámide de Keops no testemuño dunha xira por Exipto, o mural de España monárquica e as súas 18 fillas republicanas, a homenaxe a Arxentina, os reloxos dos fusos horarios mundiais, a mesquita de Mohamed Alí, elementos da mitoloxía, animais exóticos, etc.
Museos
![MarinasMuseo](https://turismo.betanzos.es/wp-content/uploads/2022/10/museodasmarinas.jpeg)
![MarinasMuseo](https://turismo.betanzos.es/wp-content/uploads/2017/11/MarinasMuseo.jpg)
O Museo das Mariñas está localizado no convento de San Domingos de Betanzos. O edificio, datado na metade do século XVI, tivo diferentes usos ata o actual, e foi a sede do propio convento, do cuartel da Garda Civil ou dun instituto municipal. Así mesmo, alberga o cine Alfonsetti, un dos máis antigos de España.
A colección abarca pezas de todas as épocas históricas, dende referencias á vida nos castros ata pezas máis actuais, e agrupa todo nos corredores de dous andares e en varias salas contiguas. Tamén conta cunha gran colección etnográfica, con varios aparellos da vida cotiá e dos antigos oficios da cidade.
Dada a importancia de Betanzos na época medieval hai que destacar a colección deste período, con obxectos como poden ser os sepulcros de Sancha Rodríguez, esposa de Fernán Pérez de Andrade; ou de Afonso de Carvallido e a súa muller, comerciantes de Betanzos e líderes da Revolta Irmandiña; ou mesmo pezas do desaparecido claustro de San Francisco e a escultura en granito do Santiago Apostol peregrino.
O viño foi un dos piares da economía da cidade e a súa historia está presente a través de diferentes lagares e elementos para o seu cultivo e fabricación. Hai que destacar tamén a colección etnográfica sobre o liño, que tanta importancia tivo na historia da rexión.
Entre as salas, destaca a chamada Sala do Traxe, que alberga unha das mellores coleccións de vestimenta tradicional da Galicia. Así mesmo destacar a colección de traxes gremiais da cidade de Betanzos e as doazóns de vestiario de familias de Betanzos, datadas no século XIX.
Outra das salas importantes é a dedicada ao antigo hospital de Santo Antonio, coas portas do hospital onde aparecen retratados os seus fundadores, e un apostolado adquirido por estes e procedente da escola de Rubens.
Na planta alta destaca, sobre todo, a recreación das escolas ideadas polos irmáns García Naveira, dous indianos que ao seu regreso da Arxentina a finais do século XIX fundaron numerosas obras asistenciais na cidade. Este andar conta tamén con obxectos curiosos como a bandeira do goberno da República no exilio de París, así como documentos e emblemas de diferentes colectivos como as Irmandades da Fala ou o Centro Betanzos de Buenos Aires.
En definitiva, o Museo das Mariñas é simplemente a porta de entrada ao vasto patrimonio da cidade de Betanzos, onde será preciso complementar a visita achegándonos a outros recursos como a propia cidade medieval, os seus templos, o parque do Pasatempo e o resto das obras dos García Naveira ou as calellas onde degustar o viño e a gastronomía da zona.
![CIEc](https://turismo.betanzos.es/wp-content/uploads/2017/11/CIEc.jpg)
A fundación CIEC, Centro Internacional da Estampa Contemporánea, está situada na Rúa do Castro no centro histórico, na coñecida como Casa Nuñez, unha obra de Rafael González Villar do ano 1923.
É un centro de arte gráfica: escola, taller, sala de exposicións, colección e biblioteca. O seu principal obxectivo é promocionar e difundir as artes plásticas en xeral e a arte gráfica en particular.
Natureza
![MarinasMuseo](https://turismo.betanzos.es/wp-content/uploads/2017/12/ruta-pelamios.jpg)
Zona de beleza paisaxística onde podemos atopar restos de 19 muíños de maquía (nos que unha parte da moenda quedaba para o muiñeiro). Actualmente unha ruta de sendeirismo permítenos percorrer esta bela paraxe.
![CIEc](https://turismo.betanzos.es/wp-content/uploads/2020/06/ruta-caneiros-betanzos.jpg)
Esta ruta de sendeirismo iníciase no Puente Viejo na zona urbana de Betanzos. Esta ruta de baixa dificultade de 2.7 km percorre a beira do río Mandeo ata o coñecido Campo de Os Caneiros, onde se celebra a peregrinación tradicional todos os anos os días 18 e 25 de agosto.